തിരൂർ പുഴയെ സംരക്ഷിക്കാനുള്ള യജ്ഞം തുടങ്ങിയിട്ട് 10 കൊല്ലത്തിൽ ഏറെയായി. ഏറെ ഫലപ്രദമായിരുന്നു ഈ പ്രവർത്തനങ്ങൾ എന്ന് പുഴയുടെ പഴയ നില ഓർമ്മയുള്ളവർക്ക് നന്നായി അറിയാം. അന്ന് എങ്ങനെയാണ് ഇരുന്നത്, ഇന്ന് എങ്ങനെയിരിക്കുന്നു എന്ന താരതമ്യം എളുപ്പമാണല്ലോ.

പുഴയുടെ തീരത്ത് താമസിക്കുന്നവർക്കും അല്ലാതെ തന്നെ ഉള്ളവർക്കും നദീസംരക്ഷണം എന്ന ഒരു ബോധം ഉണ്ടായതാണ് ഈ പ്രവർത്തനത്തിന്റെ ഏറ്റവും വലിയ നേട്ടം.

ഇതൊരു ഭഗീരഥപ്രയത്നം ആയിരുന്നു എന്ന് പറയാതിരിക്കാൻ വയ്യ. ഏതാണ്ടൊരു ഒറ്റയാൾ പട്ടാള പ്രവർത്തനം തന്നെ. ഒരു ചെറിയ കുടുംബത്തിന്റെ പ്രവർത്തനം എന്നും പറയാം. എന്തു കാര്യത്തിലും ആത്മാർപ്പണം ആണ് പ്രധാനം എന്ന് തെളിയിക്കുന്നതായിരുന്നു ഈ യജ്ഞം.

ചെറിയ താണെങ്കിലും വലുതാണെങ്കിലും പുഴ നാടിന്റെ രത്ന ഖനിയാണ് എന്ന ബോധം ഇപ്പോൾ ആളുകൾക്ക് ഉണ്ട്. ഒരു വിദ്യാലയത്തിൽ നിന്നും കിട്ടാത്ത ഈ അറിവ് അവർക്ക് കിട്ടിയത് ഈ പ്രവർത്തനത്തിൽ നിന്നാണ്. ഇത് ഈ നാടിന് നാളെ വളരെയേറെ ഗുണം ചെയ്യുന്ന പ്രത്യേകമായ അവ ബോധവൽക്കരണമാണ്. നമുക്ക് സന്തോഷിക്കുകയും അഭിമാനിക്കുകയും ചെയ്യാം. അതോടൊപ്പം, ഏതൊ ഒരു നാട്ടിൽ നിന്ന് നമ്മുടെ നാടിന്റെ രക്ഷയ്ക്കെത്തിയ ഒരു കുടുംബത്തെ അഭിനന്ദിക്കുകയും ആരാധിക്കുകയും കൂടി ചെയ്യാം.